સાયપ્રસ, કેનેડા અને ક્રોએશિયાની ત્રણ દેશોની મુલાકાત પહેલા પ્રધાનમંત્રીનું નિવેદન

આજે, હું સાયપ્રસ પ્રજાસત્તાક, કેનેડા અને ક્રોએશિયાની ત્રણ દેશોની મુલાકાતે જઈ રહ્યો છું.

15-16 જૂનના રોજ હું રાષ્ટ્રપતિ મહામહિમ નિકોસ ક્રિસ્ટોડોલિડ્સના આમંત્રણ પર સાયપ્રસ પ્રજાસત્તાકની મુલાકાત લઈશ. સાયપ્રસ ભૂમધ્ય પ્રદેશ અને યુરોપિયન યુનિયનમાં એક ગાઢ મિત્ર અને મહત્વપૂર્ણ ભાગીદાર છે. આ મુલાકાત ઐતિહાસિક સંબંધોને મજબૂત બનાવવાની અને વેપાર, રોકાણ, સુરક્ષા, ટેકનોલોજી અને લોકોથી લોકોના આદાનપ્રદાનના ક્ષેત્રોમાં આપણા સંબંધોને વિસ્તૃત કરવાની તક પૂરી પાડે છે.

સાયપ્રસથી હું માનનીય પ્રધાનમંત્રી માર્ક કાર્નીના આમંત્રણ પર G7 સમિટમાં હાજરી આપવા માટે કેનેડાના કનાનાસ્કિસ જઈશ. આ સમિટ વૈશ્વિક મુદ્દાઓ અને ગ્લોબલ સાઉથની પ્રાથમિકતાઓ પર વિચારોના આદાન-પ્રદાન માટે એક પ્લેટફોર્મ પૂરું પાડશે. હું ભાગ લેનારા દેશોના નેતાઓ સાથે વાતચીત કરવા માટે પણ આતુર છું.

હું 18 જૂનના રોજ ક્રોએશિયા પ્રજાસત્તાકની મારી મુલાકાત અને રાષ્ટ્રપતિ ઝોરાન મિલાનોવિક અને પ્રધાનમંત્રી આન્દ્રેજ પ્લેન્કોવિક સાથેની મુલાકાત માટે આતુર છું. આપણા બંને દેશો વર્ષો જૂના ગાઢ સાંસ્કૃતિક સંબંધો ધરાવે છે. ભારતીય પ્રધાનમંત્રીની ક્રોએશિયાની પ્રથમ મુલાકાત તરીકે, તે પરસ્પર હિતોના ક્ષેત્રોમાં દ્વિપક્ષીય સહયોગ માટે નવા માર્ગો ખોલશે.

આ ત્રણ દેશોની મુલાકાત સરહદપાર આતંકવાદ સામેની લડાઈમાં ભારતને અડગ સમર્થન આપવા બદલ ભાગીદાર દેશોનો આભાર માનવાની અને આતંકવાદના તમામ સ્વરૂપો અને અભિવ્યક્તિઓમાં તેમનો સામનો કરવા માટે વૈશ્વિક સમજણને પ્રેરણા આપવાની તક પણ છે.