ભારતીય ડાક વિભાગે અમદાવાદ ખાતે ગ્રુપ મંગલમ પર કસ્ટમાઇઝ્ડ ડાક ટિકિટ અને વિશેષ આવરણ જારી કર્યું

ભારતીય ડાક વિભાગ દ્વારા સ્વર્ગીય શ્રી તેજમલજી મંગલ દ્વારા સ્થાપિત ‘ગ્રુપ મંગલમ – 84 વર્ષની સફળ યાત્રા’ વિષયક એક કસ્ટમાઇઝ્ડ ડાક ટિકિટ અને વિશેષ આવરણ જારી કરવામાં આવ્યું. અમદાવાદના નવરંગપુરા સ્થિત મંગલમ વર્લ્ડવાઇડ લિમિટેડ ખાતે આયોજિત સમારોહમાં ગુજરાત પરિમંડળના મુખ્ય પોસ્ટમાસ્ટર જનરલ શ્રી ગણેશ વી. સાવળેશ્વરકર તથા ઉત્તર ગુજરાત ક્ષેત્રના પોસ્ટમાસ્ટર જનરલ શ્રી કૃષ્ણ કુમાર યાદવે તા. 1 જૂન, 2026ના રોજ આ ડાક ટિકિટ અને વિશેષ આવરણ જારી કર્યું. આ પ્રસંગે શ્રી ઓમ પ્રકાશ મંગલ, મંગલમ ગ્રુપના અધ્યક્ષ શ્રી વિપિન પ્રકાશ મંગલ, પ્રવર ડાક અધિક્ષક શ્રી ચિરાગ મહેતા, ડેપ્યુટી અધિક્ષક સુશ્રી મંજુલાબેન પટેલ, સહાયક નિદેશક શ્રી અલ્પેશ શાહ સહિત અનેક અધિકારીઓ અને મહાનુભાવો ઉપસ્થિત રહ્યા.

આ પ્રસંગે મુખ્ય પોસ્ટમાસ્ટર જનરલ શ્રી ગણેશ વી. સાવળેશ્વરકરે જણાવ્યું કે ટપાલ ટિકિટો દ્વારા દેશની સંસ્કૃતિ, કલા, વારસા, ઇતિહાસ, મહાન વ્યક્તિત્વો, મહત્વપૂર્ણ ઘટનાઓ તેમજ જ્ઞાન-વિજ્ઞાન અને વિવિધ સિદ્ધિઓનું પ્રતિબિંબ દર્શાવવામાં આવે છે. ટપાલ ટિકિટો સંચારના માધ્યમ તરીકે કાર્ય કરવા ઉપરાંત રાષ્ટ્રીય ગૌરવ અને સાંસ્કૃતિક વારસાના પ્રસાર તથા સંવર્ધનમાં પણ મહત્વપૂર્ણ ભૂમિકા ભજવે છે. ભારતીય ડાક વિભાગની કસ્ટમાઇઝ્ડ ટપાલ ટિકિટ યોજના સંસ્થાઓ, ઉદ્યોગો અને સંગઠનોને તેમની સિદ્ધિઓ, વારસા અને બ્રાન્ડ ઓળખને ઉજાગર કરવા માટે એક અનોખું મંચ પ્રદાન કરે છે. મંગલમ ગ્રુપની સિદ્ધિઓને સમર્પિત આ કસ્ટમાઇઝ્ડ ટપાલ ટિકિટ સંસ્થાની દીર્ઘકાલીન સફળતા, તેના ઉત્કૃષ્ટ યોગદાન અને સમાજમાં સ્થાપિત વિશ્વાસનું રાષ્ટ્રીય સ્તરે સન્માન છે. મંગલમ ગ્રુપને તેની 84 વર્ષની ગૌરવશાળી અને પ્રેરણાદાયી યાત્રા બદલ હાર્દિક અભિનંદન અને શુભેચ્છાઓ પાઠવતાં તેમણે જણાવ્યું કે મંગલમ ગ્રુપે વિકાસ અને વિશ્વાસની એક મજબૂત પરંપરા ઊભી કરી છે, જે આવનારી પેઢીઓ માટે પણ પ્રેરણાનું સ્ત્રોત બની રહેશે.

પોસ્ટમાસ્ટર જનરલ શ્રી કૃષ્ણ કુમાર યાદવે જણાવ્યું કે ટપાલ ટિકિટ માત્ર એક સ્મૃતિચિહ્ન નથી, પરંતુ ઇતિહાસનું એક જીવંત દસ્તાવેજ છે. દરેક ટપાલ ટિકિટ પાછળ એક અનોખી વાર્તા છુપાયેલી હોય છે અને આજની યુવા પેઢીને આ વાર્તાઓ સાથે જોડવાની જરૂર છે. તેમણે વધુમાં જણાવ્યું કે આ વિશેષ ટપાલ ટિકિટ મંગલમ ગ્રુપની પ્રેરણાદાયી ગાથાને દેશભરના લોકો સુધી પહોંચાડશે અને તેની ગૌરવશાળી વારસાને આવનારી પેઢીઓ માટે સંરક્ષિત રાખવામાં મહત્વપૂર્ણ ભૂમિકા ભજવશે. ટપાલ ટિકિટ ખરેખર એક નાનો રાજદૂત છે, જે વિવિધ દેશોની મુલાકાત લે છે અને લોકોને પોતાની સંસ્કૃતિ, સભ્યતા તથા વારસાથી પરિચિત કરાવે છે.

મંગલમ ગ્રુપના અધ્યક્ષ શ્રી વિપિન પ્રકાશ મંગલે મંગલમ ગ્રુપની 84 વર્ષની સફળ યાત્રાનો ઉલ્લેખ કરતાં જણાવ્યું કે વર્ષ 1942માં રાજસ્થાનના બ્યાવર ખાતે સ્વર્ગસ્થ શ્રી તેજમલજી મંગલ દ્વારા સ્થાપિત મંગલમ ગ્રુપે ઉત્કૃષ્ટતા અને પ્રગતિની એક મજબૂત પરંપરા ઊભી કરી છે, જેને અનુગામી નેતૃત્વ દ્વારા નવી ઊંચાઈઓ સુધી પહોંચાડવામાં આવી છે. આજે, વિશ્વાસ, નવીનતા અને સર્વસમાવેશક વિકાસની 84 વર્ષની યાત્રા સાથે મંગલમ ગ્રુપ એક પ્રતિષ્ઠિત ઉદ્યોગ સમૂહ તરીકે સ્થાપિત થયું છે. ગ્રુપ કૃષિ ઉત્પાદનો, સ્ટેનલેસ સ્ટીલ અને રિટેલ જેવા મુખ્ય ક્ષેત્રોમાં સફળતાપૂર્વક કાર્યરત છે. તેમણે જણાવ્યું કે ગ્રુપનો ઉદ્દેશ મજબૂત કોર્પોરેટ નાગરિકતાને “ગ્રાહક-પ્રથમ” અભિગમ સાથે સંતુલિત રાખવાનો છે, જેથી આધુનિક ઔદ્યોગિક પડકારોનો અસરકારક રીતે સામનો કરી શકાય અને તેના ઉકેલો પ્રદાન કરી શકાય.