‘सर्वात लहान दिवस, सर्वात मोठा संदेश’: आयआयएम नागपूरमध्ये जागतिक ध्यान दिन साजरा

नागपूर : २१ डिसेंबर २०२५. भारतीय प्रबंध संस्था नागपूर (आयआयएम नागपूर) परिसरात रविवारी सकाळी जागतिक ध्यान दिन उत्साहात साजरा करण्यात आला. शारीरिक आरोग्यापलीकडे जाऊन आत्मकल्याणावर भर देण्याची गरज असल्याचे वक्त्यांनी अधोरेखित केले.

कार्यक्रमात बोलताना हिमालयन समर्पण ध्यानयोग चळवळीचे संस्थापक शिवकृपानंद स्वामीजी यांनी ध्यानाच्या मूळ उद्देशावर प्रकाश टाकला. योगामुळे शरीर सुदृढ होते आणि मन स्थिर होते; मात्र ध्यान आत्म्याचे कल्याण करते, आणि तेच सर्वोच्च आरोग्य असल्याचे त्यांनी सांगितले.

आंतरराष्ट्रीय योग दिन (२१ जून) मुळे योगाला जागतिक स्तरावर मोठी ओळख मिळाली असून, आता भारताने जगाला पुढील पायरीकडे म्हणजेच ध्यान-समाधीकडे नेण्याची वेळ आल्याचे स्वामीजी म्हणाले.

यावेळी आयआयएम नागपूरचे संचालक डॉ. भीमराया मेत्री यांनीही कार्यक्रमाचे महत्त्व स्पष्ट केले. “२१ डिसेंबर हा वर्षातील सर्वात लहान दिवस असला, तरी आज आपण जगाला सर्वात मोठा संदेश देत आहोत,” असे ते म्हणाले.

दीपप्रज्वलन समारंभाला आयआयएम नागपूरचे संचालक प्रा. मेत्री, इन्फोसिसचे राहुल करंगाळे, नागपूर परिक्षेत्राचे पोलीस महानिरीक्षक संदीप पाटील, ज्येष्ठ उद्योजक शशिकांत चौधरी, आणि कामठी कॅन्टोन्मेंट बोर्डचे अध्यक्ष ब्रिगेडियर अभिजीत वाळिंबे उपस्थित होते. गुरुतत्त्व आणि समर्पण ध्यान चळवळीचे प्रतिनिधी म्हणून शीना ओमप्रकाश, आशिष थळावर आणि लीलाधर ठामके सहभागी झाले.

या कार्यक्रमाला नागपूरमधील मान्यवर नागरिक आणि विविध क्षेत्रांतील नामवंत व्यक्ती मोठ्या संख्येने उपस्थित होत्या. आयआयएम नागपूरचे प्राध्यापक, कर्मचारी यांच्यासह शेकडो विद्यार्थ्यांनी या कार्यक्रमात उत्स्फूर्त सहभाग नोंदवला.