गिरणगावच्या लालबाग-परळ हिंदू नववर्ष शोभायात्रेत मराठी भाषेचा जागर

लालबाग, परळ आणि काळाचौकी या गिरणगाव विभागातील ‘गिरणगाव सांस्कृतिक प्रतिष्ठान’च्या वतीने  हिंदू नववर्ष शोभायात्रेत यंदा  मराठी भाषा ‘स्व’त्वाच्या  अस्मितेचा आणि संस्कृतीचे प्रतीक यांचा  जागर होणार आहे. रविवार, ३० मार्च रोजी गुढीपाडव्यानिमित्त होणाऱ्या या शोभायात्रेत पारंपरिक प्रात्यक्षिकांसह अनेक चित्ररथांचा सहभाग असणार आहे.

यावर्षी ३० मार्च रोजी सकाळी ८ वाजता परळ येथील श्री स्वामी समर्थ मठातून या नववर्ष स्वागताच्या शोभायात्रेची सुरुवात होणार आहे आणि ‘गिरणगावाचा राजा’ चिंचपोकळी दक्षिण विभाग सार्वजनिक गणेशोत्सव मंडळ, मुक्ता जयहिंद सिनेमागृह येथे समारोप होणार आहे. या शोभायात्रेत शिवकालीन देखावा(गिरणगाव सांस्कृतिक प्रतिष्ठान लालबाग – परळ), अभिजात मराठी(स्वयंसिध्दा महिला मंडळ परळ), हिंदूपदपादशाही(आंबेवाडी सार्वजनिक गणेशोत्सव मंडळ), अमृत गोडी लाभले आम्हास  भाग्य बोलतो मराठी(‘आपली सोसल वाहिनी’ अर्थात आसोवा – मराठी युट्युब चॅनेल), एकमेकां साहाय्य करू। अवघे होऊ श्रीमंत।।(मराठी उद्योजक – सॅटर्डे क्लब ग्लोबल ट्रस्ट) असे चित्ररथ असणार आहे. तसेच ‘भारतमाता पालखी’, पथनाट्य(आसोवा – मराठी युट्युब चॅनेल) महाराष्ट्रातील दांडपट्टा, लाठीकाठी अशा पारंपरिक खेळांची प्रात्यक्षिके, मल्लखांब, ढोलताशा हे शोभायात्रेचे मुख्य आकर्षण असणार आहे.

या शोभायात्रेत आशियाई महिला कबड्डी स्पर्धा-२०२५मध्ये अजिंक्यपद पटकावणाऱ्या भारतीय कबड्डी महिला संघाची कर्णधार सोनाली विष्णू शिंगाटे त्याचप्रमाणे ‘दगडी चाळ’- १-२ , ‘भेटली तू पुन्हा’ या चित्रपटाचे दिग्दर्शक  ‘दुनियादारी’, ‘फक्त लढ म्हणा’ असे सिनेमे व ‘थोडं तुझं थोडं माझं’, ‘आभास हा’, ‘सुख म्हणजे नक्की काय असतं’ अशा मालिकांत अभिनय करणारे चंद्रकांत ऊर्फ बंटी विष्णू कानसे या दोघांना गिरणगाव भूषण हा पुरस्कार देऊन सन्मानित करणार आहे.

Featured Article