રેપ્કો બેંકે કેન્દ્રીય ગૃહ અને સહકારિતા મંત્રી શ્રી અમિત શાહને વર્ષ 2024-25 માટે રૂ. 22.90 કરોડનો ડિવિડન્ડ ચેક સોંપ્યો

રેપ્કો બેંકે આજે નવી દિલ્હીમાં કેન્દ્રીય ગૃહ અને સહકારિતા મંત્રી શ્રી અમિત શાહને વર્ષ 2024-25 માટે રૂ. 22.90 કરોડનો ડિવિડન્ડ ચેક સોંપ્યો. કેન્દ્રીય ગૃહમંત્રીએ નાણાકીય વર્ષ 2024-25માં રૂ. 140 કરોડનો રેકોર્ડ નફો મેળવવા બદલ રેપ્કો બેંકની ટીમને અભિનંદન આપ્યા હતા.

‘X’ પરની એક પોસ્ટમાં શ્રી અમિત શાહે જણાવ્યું હતું કે ગૃહ મંત્રાલયના અધિકારક્ષેત્ર હેઠળની બેંકે કાર્યક્ષમતા, સમર્પણ અને વ્યાવસાયિકતાનું એક ઉદાહરણ સ્થાપિત કર્યું છે જે સહકારી ક્ષેત્ર માટે પ્રેરણાસ્ત્રોત બનશે. ભવિષ્યની સફર માટે ટીમને શુભેચ્છાઓ.

રેપ્કો બેંકના ચેરમેન શ્રી ઇ. સંથાનમ, ડિરેક્ટર – રેપ્કો બેંક અને રેપ્કો હોમ ફાઇનાન્સ લિમિટેડના ચેરમેન શ્રી સી. થંગારાજુ અને મેનેજિંગ ડિરેક્ટર શ્રી ઓ.એમ. ગોકુલે ગૃહમંત્રીને ચેક સોંપ્યો. કેન્દ્રીય ગૃહ સચિવ શ્રી ગોવિંદ મોહન અને બોર્ડર મેનેજમેન્ટ સચિવ ડૉ. રાજેન્દ્ર કુમાર પણ આ પ્રસંગે હાજર હતા.

રેપ્કો બેંકે નાણાકીય વર્ષ 2024-25 દરમિયાન રૂ. 140 કરોડનો ચોખ્ખો નફો મેળવ્યો અને 30% ડિવિડન્ડ ચૂકવ્યું, જે સહકારી સમાજના ઇતિહાસમાં સૌથી વધુ છે. રેપ્કો બેંક ભારત સરકારનું સાહસ છે. ભારત સરકાર રેપ્કો બેંકમાં 50.08% હિસ્સો ધરાવે છે અને ગૃહ મંત્રાલયના વહીવટી નિયંત્રણ હેઠળ આવે છે. તે સતત નફો કરતી સંસ્થા છે, જે ત્રણ દાયકાથી વધુ સમયથી સતત ડિવિડન્ડ જાહેર કરે છે.