വിജിലൻസ് അവബോധ വാരാചരണത്തിൽ രാഷ്‌ട്രപതി പങ്കെടുത്തു

രാഷ്ട്രപതി, ശ്രീമതി ദ്രൗപദി  മുർമു ഇന്ന് (നവംബർ 8, 2024) വിജിലൻസ് അവബോധ വാരാചരണം  2024-ൽ പങ്കെടുത്തു.  സമഗ്രതയും അച്ചടക്കവുമാണ് ജീവിതത്തിൻ്റെ ആദർശങ്ങളായി നമ്മുടെ സമൂഹത്തിൽ കണക്കാക്കുന്നതെന്ന് ചടങ്ങിൽ സംസാരിച്ച രാഷ്ട്രപതി പറഞ്ഞു. ഇന്ത്യൻ ജനത  അച്ചടക്കമില്ലായ്മ ഇഷ്ടപ്പെടുന്നില്ലെന്നും നിയമം  അനുസരിക്കുന്നുവെന്നുമാണ് ഏകദേശം 2300 വർഷങ്ങൾക്ക് മുമ്പ് മെഗസ്തനീസ്  ഇന്ത്യൻ ജനതയെ കുറിച്ചു എഴുതിയത് . അവരുടെ ജീവിതത്തിൽ ലാളിത്യവും നിഷ്ഠയുമുണ്ട് . സമാനമായ പരാമർശങ്ങൾ ഫാ-ഹിയാൻ നമ്മുടെ പൂർവ്വികരെ കുറിച്ച് നടത്തിയിട്ടുണ്ട്. ഈ സാഹചര്യത്തിൽ, സി വി സി  ഈ വർഷത്തെ പ്രമേയമായ ‘രാഷ്ട്രത്തിൻ്റെ സമൃദ്ധിക്ക് സമഗ്രതയുടെ സംസ്കാരം’ വളരെ അനുയോജ്യമാണ്.

വിശ്വാസമാണ് സാമൂഹിക ജീവിതത്തിൻ്റെ അടിത്തറയെന്ന് രാഷ്ട്രപതി പറഞ്ഞു. അത് ഐക്യത്തിൻ്റെ ഉറവിടമാണ്. ഗവണ്മെന്റിന്റെ  പ്രവർത്തനങ്ങളിലും ക്ഷേമപദ്ധതികളിലും ജനങ്ങൾക്കുള്ള വിശ്വാസമാണ് ഭരണത്തിൻ്റെ ശക്തിയുടെ ഉറവിടം. അഴിമതി സാമ്പത്തിക പുരോഗതിക്ക് തടസ്സം മാത്രമല്ല, സമൂഹത്തിലുള്ള വിശ്വാസം കുറയ്ക്കുകയും ചെയ്യുന്നു. അത് ജനങ്ങൾക്കിടയിലെ സാഹോദര്യ വികാരങ്ങളെ പ്രതികൂലമായി ബാധിക്കുന്നു. രാജ്യത്തിൻ്റെ ഐക്യത്തിലും അഖണ്ഡതയിലും ഇത് വ്യാപകമായ സ്വാധീനം ചെലുത്തുന്നു. എല്ലാ വർഷവും ഒക്ടോബർ 31 ന്, സർദാർ പട്ടേലിൻ്റെ ജന്മദിനത്തിൽ, രാജ്യത്തിൻ്റെ ഐക്യവും അഖണ്ഡതയും നിലനിർത്തുമെന്ന് നമ്മൾ  പ്രതിജ്ഞയെടുക്കുന്നു. ഇത് വെറുമൊരു ആചാരമല്ല. അത് ഗൗരവമായി എടുക്കേണ്ട പ്രതിജ്ഞയാണ്. അത് നിറവേറ്റാൻ നമുക്കെല്ലാവർക്കും കൂട്ടായ ഉത്തരവാദിത്തമുണ്ട്.

ധാർമികതയാണ് ഇന്ത്യൻ സമൂഹത്തിൻ്റെ ആദർശമെന്ന് രാഷ്ട്രപതി പറഞ്ഞു. ചില വ്യക്തികൾ വസ്തുവകയും  പണവും സ്വത്തുക്കളും ഒരു മികച്ച  ജീവിതത്തിൻ്റെ മാനദണ്ഡമായി കണക്കാക്കാൻ തുടങ്ങുമ്പോൾ, അവർ ഈ ആദർശത്തിൽ നിന്ന് വ്യതിചലിച്ച് അഴിമതി പ്രവർത്തനങ്ങളിലേക്ക് തിരിയുന്നു. അടിസ്ഥാന ആവശ്യങ്ങൾ നിറവേറ്റി ആത്മാഭിമാനത്തോടെ ജീവിക്കുന്നതാണ്  സന്തോഷമെന്നും  രാഷ്‌ട്രപതി പറഞ്ഞു

ഏതൊരു ജോലിയും ശരിയായ ചിന്തയോടെയും  നിശ്ചയദാർഢ്യത്തോടെയും ചെയ്താൽ വിജയം സുനിശ്ചിതമാണെന്നും രാഷ്ട്രപതി പറഞ്ഞു. വൃത്തിഹീനത നമ്മുടെ നാടിൻ്റെ വിധിയാണെന്ന് ചിലർ കരുതി. എന്നാൽ ശക്തമായ നേതൃത്വവും രാഷ്ട്രീയ ഇച്ഛാശക്തിയും പൗരന്മാരുടെ സംഭാവനയും ശുചിത്വ മേഖലയിൽ നല്ല ഫലങ്ങൾ കൊണ്ടുവന്നു. അതുപോലെ അഴിമതി നിർമാർജനം അസാധ്യമെന്നു കരുതുന്ന ചിലരുടെ അശുഭാപ്തികരമായ  മനോഭാവവും ശരിയല്ല. “അഴിമതിക്കെതിരായ സഹിഷ്ണുത ഇല്ലായ്മ ” എന്ന കേന്ദ്ര ഗവണ്മെന്റിന്റെ നയം അഴിമതിയെ വേരോടെ പിഴുതുമാറ്റുമെന്ന്   അവർ ആത്മവിശ്വാസം പ്രകടിപ്പിച്ചു.

അഴിമതിക്കാർക്കെതിരെ സത്വര നിയമനടപടികൾ വളരെ പ്രധാനമാണെന്ന് രാഷ്ട്രപതി പറഞ്ഞു. പ്രവർത്തനത്തിലെ കാലതാമസമോ ദുർബല പ്രവർത്തനമോ അധാർമ്മികരായ വ്യക്തികളെ പ്രോത്സാഹിപ്പിക്കുന്നു. എന്നാൽ ഓരോ പ്രവൃത്തിയെയും  വ്യക്തിയെയും  സംശയദൃഷ്ടിയോടെ കാണേണ്ടതില്ല എന്നതും ആവശ്യമാണ്. നാം ഇത് ഒഴിവാക്കണം. വ്യക്തിയുടെ അന്തസിന് പ്രാധാന്യം നൽകിക്കൊണ്ട് , ഒരു പ്രവൃത്തിയും ചെയ്യാൻ ദുരുദ്ദേശ്യത്തോടെ പ്രേരിപ്പിക്കരുത്. സമൂഹത്തിൽ നീതിയും സമത്വവും സ്ഥാപിക്കുക എന്നതായിരിക്കണം ഏതൊരു പ്രവർത്തനത്തിൻ്റെയും ലക്ഷ്യം എന്നും രാഷ്‌ട്രപതി പറഞ്ഞു