ડાક વિભાગ દ્વારા અમદાવાદમાં માર્કેટિંગ એક્ઝિક્યુટિવ વર્કશોપ નું આયોજન, પોસ્ટમાસ્ટર જનરલ કૃષ્ણ કુમાર યાદવે કર્યો શુભારંભ

ડાક વિભાગ દેશના સામાજિક-આર્થિક વિકાસમાં પોતાની મહત્વપૂર્ણ ભૂમિકા મજબૂત બનાવતા સતત આધુનિક ટેકનોલોજી, ડિજિટલ સોલ્યુશન્સ તથા નવીનતાઓ દ્વારા પોતાની સેવાઓનો વિસ્તાર કરી રહ્યો છે. જનસેવાને કેન્દ્રમાં રાખીને વિભાગે પરંપરાગત ડાક વ્યવસ્થાથી આગળ વધી આજે નાણાકીય સમાવેશ, લોજિસ્ટિક્સ, ઈ-કોમર્સ સપોર્ટ તથા ડિજિટલ સેવાઓના ક્ષેત્રમાં એક વિશ્વસનીય સંસ્થા તરીકે પોતાની ઓળખ સ્થાપી છે. આ ઉદ્દગાર ઉત્તર ગુજરાત પરિક્ષેત્ર, અમદાવાદના પોસ્ટમાસ્ટર જનરલ શ્રી કૃષ્ણ કુમાર યાદવે ક્ષેત્રીય કાર્યાલય, અમદાવાદ ખાતે આયોજિત એકદિવસીય ‘માર્કેટિંગ એક્ઝિક્યુટિવ વર્કશોપ’ના શુભારંભ દરમિયાન વ્યક્ત કર્યા. આ અવસરે ઉત્તર ગુજરાત પરિક્ષેત્રના વિવિધ મંડળોના 45 માર્કેટિંગ એક્ઝિક્યુટિવ તથા ડેવલપમેન્ટ ઓફિસર (ડાક જીવન વીમા) ઉપસ્થિત રહ્યા હતા. તેમને બચત બેંક, ડાક જીવન વીમા, ઈન્ડિયા પોસ્ટ પેમેન્ટ્સ બેંક, સ્પીડ પોસ્ટ, ઈન્ડિયા પોસ્ટ પાર્સલ, આંતરરાષ્ટ્રીય મેલ, ડાકઘર નિર્યાત કેન્દ્ર, જ્ઞાન પોસ્ટ, મેગેઝિન પોસ્ટ, રિટેલ પોસ્ટ, ઈ-પોસ્ટ, ઈ-પેમેન્ટ, આધાર સેવાઓ તેમજ વિવિધ મંદિરોના પ્રસાદ અને ગંગાજળની ડિલિવરી જેવી વિશિષ્ટ સેવાઓ સાથે સાથે તાજેતરમાં શરૂ કરવામાં આવેલી નવી પહેલોની વિસ્તૃત માહિતી આપવામાં આવી. આ સેવાઓના અસરકારક પ્રચાર-પ્રસાર અને ગ્રાહક જોડાણની રણનીતિઓ અંગે તેમને સશક્ત બનાવવાનું પણ વર્કશોપનું મુખ્ય લક્ષ્ય હતું. આ દરમિયાન સહાયક અધિક્ષક શ્રી ભાવિન પ્રજાપતિ દ્વારા પાવર પોઇન્ટ પ્રેઝન્ટેશન રજૂ કરવામાં આવ્યું.

પોસ્ટમાસ્ટર જનરલ શ્રી કૃષ્ણ કુમાર યાદવે જણાવ્યું કે ડાક વિભાગ નવીનતમ ટેક્નોલોજી અપનાવીને ડિજિટલ પહેલો તથા આધુનિક સેવાઓ દ્વારા નાગરિકોના અનુભવને સતત વધુ ઉત્તમ બનાવી રહ્યો છે. કેન્દ્રીય સંચાર મંત્રી શ્રી જ્યોતિરાદિત્ય એમ. સિંધિયાજી ના દૃષ્ટિકોણથી પ્રેરિત થઈ ઉત્તર ગુજરાતમાં યુવાઓ માટે આઈઆઈટી ગાંધીનગર અને આઈઆઈએમ અમદાવાદ ખાતે એન-જન પોસ્ટ ઓફિસની શરૂઆત કરવામાં આવી છે. શહેરી વિસ્તારોના તમામ પોસ્ટ ઓફિસ સાથે-સાથે હવે ગ્રામ્ય વિસ્તારોમાં આવેલા બ્રાંચ પોસ્ટ ઓફિસો મારફતે પણ ડિજિટલ ચુકવણી જેવી આધુનિક સેવાઓ ઉપલબ્ધ કરાવવામાં આવી રહી છે, જેના કારણે નાગરિકોને ઝડપી, સુરક્ષિત અને સુવિધાજનક સેવાઓનો લાભ મળી રહ્યો છે. ઉત્તર ગુજરાત પરિક્ષેત્રમાં એડવાન્સ્ડ પોસ્ટલ ટેકનોલોજી 2.0 અમલમાં આવ્યા બાદ ઓગસ્ટ માસથી અત્યાર સુધી અંદાજે 3 લાખ ડિજિટલ ચુકવણીઓ સફળતાપૂર્વક કરવામાં આવી છે, જેનાથી ડિજિટલ ઈન્ડિયા અને કેશલેસ ઇકોનોમીને વધુ બળ મળ્યું છે. આ ઉપરાંત, ઇન્ડિયા પોસ્ટે ઓએનડીસી (ઓપન નેટવર્ક ફોર ડિજિટલ કોમર્સ)ના સહયોગથી માયસ્ટોર પ્લેટફોર્મ દ્વારા દેશભરમાં પાર્સલ પેકેજિંગ, બુકિંગ તથા ડિલિવરી સેવાઓને વધુ મજબૂત બનાવી છે. અમદાવાદ જીપીઓમાં પાયલટ આધાર પર નાના ઉત્પાદકો અને સોશિયલ સેલર્સને નિઃશુલ્ક વેરહાઉસિંગ સુવિધા આપવામાં આવી રહી છે. સાથે સાથે, વિદ્યાર્થીઓ માટે સ્પીડ પોસ્ટ તથા પાર્સલ બુકિંગ પર 10% વિશેષ છૂટ ઉપલબ્ધ કરાવવામાં આવી છે. ઉત્તર ગુજરાત પરિક્ષેત્રમાં 1400થી વધુ જથ્થાબંધ ગ્રાહકો છે. સ્પીડ પોસ્ટ વ્યવસાયને પ્રોત્સાહન આપવા માટે જે ગ્રાહકો દ્વારા માસિક ₹2 લાખથી વધુ વ્યવસાય આપવામાં આવે છે, તેમને બુકિંગ રકમ પર 10%થી 50% સુધીની છૂટની સુવિધા આપવામાં આવી રહી છે. ડિજિટલ યુગમાં પણ ઇન્ડિયા પોસ્ટની સેવાઓ વિશ્વસનીય, સુલભ અને જનહિતકારી છે અને તેમની અસરકારક માર્કેટિંગ દ્વારા વધુમાં વધુ લોકોને લાભાન્વિત કરી શકાય છે.

આ વર્કશોપ દરમિયાન વિવિધ મંડળોના માર્કેટિંગ એક્ઝિક્યુટિવ્સ દ્વારા પોતાના ક્ષેત્રોમાં કરવામાં આવી રહેલા કાર્યોની રજૂઆત કરવામાં આવી, જેના પર વિસ્તૃત ચર્ચા તથા વિશ્લેષણ કરવામાં આવ્યું. સ્થાનિક પરિસ્થિતિ, પ્રાદેશિક ઉદ્યોગોની હાજરી તથા વ્યવસાયિક ક્ષમતાને ધ્યાનમાં રાખીને તેમને વિશિષ્ટ અને પરિણામલક્ષી વિકાસ રણનીતિઓથી અવગત કરાવવામાં આવ્યા, જેથી ઝડપી, ટકાઉ અને અસરકારક વ્યવસાયિક વૃદ્ધિ સુનિશ્ચિત કરી શકાય. પ્રતિભાગીઓને ડિજિટલ માર્કેટિંગ, ગ્રાહક વર્તન વિશ્લેષણ, સોશિયલ મીડિયા રણનીતિઓ તથા પ્રચાર તકનીકો અંગે વિસ્તૃત માહિતી આપવામાં આવી. સાથે સાથે અનુભવ વહેંચવા અને નવીન વિચારોના આદાન-પ્રદાન માટે પણ અવસર પૂરા પાડવામાં આવ્યા. ગ્રાહકોની આવશ્યકતાઓને સમજી સેવા-આધારિત માર્કેટિંગ અપનાવવા પર ખાસ ભાર મૂકવામાં આવ્યો. સમીક્ષા દરમિયાન ભવિષ્યની પ્રાથમિકતાઓને અનુરૂપ નિર્ધારિત લક્ષ્યોની સમયબદ્ધ સિદ્ધિ તથા વ્યવસાયિક વૃદ્ધિને સુનિશ્ચિત કરવા પર વિશેષ ભાર મૂકવામાં આવ્યો.

સ્વાગત પ્રવચન સહાયક નિદેશક શ્રી અલ્પેશ શાહ દ્વારા અને આભાર નિવેદન શ્રી રિતુલ ગાંધી દ્વારા કરવામાં આવ્યું. કાર્યક્રમનું સંચાલન શ્રી ચિરાયુ વ્યાસે કર્યું.