கோவாவில் இம்மாதம் 20ம் தேதி முதல் 28-ம் தேதி வரை நடைபெற உள்ள 55 வது இந்திய சர்வதேச திரைப்பட விழாவில் தென்னகத்தைச் சேர்ந்த திரைத்துறையினர் பெருந்திரளாக கலந்துகொள்ள வேண்டும் என்று மத்திய தகவல் ஒலிபரப்புத் துறை இணையமைச்சர் டாக்டர் எல். முருகன் அழைப்பு விடுத்துள்ளார். சென்னையில் இன்று தமிழ், தெலுங்கு, மலையாளம் மற்றும் கன்னடத்  திரைத்துறையைச் சேர்ந்த தயாரிப்பாளர்கள், இயக்குநர்கள் உள்ளிட்ட அனைத்துத் தரப்பினரையும்  சந்தித்து அவர் கலந்துரையாடினார். மேலும் இந்த விழா தொடர்பான முன்னேற்பாடுகள், செய்யப்பட்டுள்ள வசதிகள் குறித்தும் விவரித்தார். இந்த நிகழ்வில் தென்னிந்திய திரைப்பட தொழில் வர்த்தக சபையின் தலைவர் ரவி கொட்டாரக்கரா உள்ளிட்டோர் கலந்து கொண்டனர். திரைப்பட விழா பற்றி எடுத்துரைத்த மத்திய அமைச்சர், இந்திய திரைத்துறை ஆளுமைகளான ராஜ்கபூர், தபன் சின்ஹா, முகமது ரஃபி, நாகேஸ்வரராவ் ஆகியோரின் நூற்றாண்டு விழாவும்  கொண்டாடப்படுவதாக கூறினார். இந்த ஆண்டு திரைப்பட விழாவில்  கவனக் குவிப்பு நாடாக ஆஸ்திரேலியா தெரிவு செய்யப்பட்டுள்ளது. ஆஸ்திரேலியாவைச் சேர்ந்த திரைப்பட இயக்குநர் பிலிப் நோயிஸுக்கு சத்யஜித்ரே வாழ்நாள் சாதனையாளர் விருது வழங்கப்பட உள்ளது. இந்த நாட்டிலிருந்து  தயாரிப்பாளர்கள் , இயக்குநர்கள் உட்பட 40 திரை ஆளுமைகள்  விழாவில் பங்கேற்க உள்ளனர்.  திரைப்பட விழாவின் தொடக்க திரைப்படமாக  ஆஸ்திரேலியாவின் பெட்டர் மேன் திரையிடப்படும் என்று அமைச்சர் அவர் கூறினார். இந்தியாவின் சிறந்த முதல்முறை இயக்குனர் விருது இந்த ஆண்டு புதிதாக அறிமுகம் செய்யப்பட்டுள்ளது என்றும் அவர் கூறினார். திரைப்பட விழாவில் நாடு முழுவதிலும் இருந்து 400 திரைப்பள்ளிகளைச் சேர்ந்த மாணவர்கள் பங்கேற்க உள்ளனர் என்று அவர் தெரிவித்தார். இந்த ஆண்டு திரைப்பட விழாவில் பெருந்திரளாக மக்கள்  பங்கேற்கும் வகையில் திரையரங்குகளின்  இருக்கைகள்  50 சதவீதம் அதிகரிக்கப்பட்டுள்ளன என்று அவர் கூறினார். வேவ்ஸ் எனும் உலகளாவிய ஒலி, ஒளி, பொழுதுபோக்கு உச்சி மாநாடு வரும் பிப்ரவரி மாதம் 5-ம் தேதி முதல் 9-ம் தேதி வரை புதுதில்லியில் உள்ள பாரத் மண்டபத்தில் நடைபெற உள்ளதாக அமைச்சர் தெரிவித்தார். வானொலி, தொலைக்காட்சி, ஓடிடி, டிஜிட்டல், சினிமா, அனிமேஷன், கேமிங்  உள்ளிட்டவற்றை உள்ளடக்கியதாக இந்த உச்சிமாநாட்டு நிகழ்வுகள் அமையும். படைப்பாக்கப் பொருளாதாரத்தின்  குவிமையமாக இந்தியா மாறிவரும் சூழ்நிலையில் அதனை மேலும் விரிவுபடுத்துவதை நோக்கமாகக் கொண்டு இந்த உச்சிமாநாடு நடத்தப்படுவதாக அவர் தெரிவித்தார். இந்த மாநாட்டிலும் பங்கேற்றுப் பயன்பெறவேண்டும் என்று பங்கேற்பாளர்களை அமைச்சர் டாக்டர் எல். முருகன் கேட்டுக்கொண்டார். அமைச்சரின் இந்த சந்திப்பில் மத்திய தகவல் ஒலிபரப்பு துறையின் இணைச்செயலாளரும் தேசிய  திரைப்பட வளர்ச்சிக் கழகத்தின் தலைவருமான திரு பிரித்துல் குமார், மத்திய திரைப்பட சான்றளிப்பு வாரியத்தின் தலைமை நிர்வாக அதிகாரி திரு ராஜேந்திர சிங்  ஆகியோர் உடனிருந்தனர்.            

அறிவியல் மற்றும் தொழில்நுட்ப அமைச்சகத்தின் உயிரி தொழில்நுட்பத் துறை மத்திய அமைச்சரவை ஒப்புதலுடன் 14 தன்னாட்சி நிறுவனங்களை  ஒருங்கிணைத்து 2023 நவம்பர் 10 அன்று உயிரி தொழில்நுட்ப ஆராய்ச்சி மற்றும் கண்டுபிடிப்பு கவுன்சிலை (ப்ரிக்) உருவாக்கியது. அறிவியல் மற்றும் தொழில்நுட்பத் துறை இணையமைச்சர் (தனிப்பொறுப்பு) டாக்டர் ஜிதேந்திர சிங்கின் முன்மாதிரியான தலைமை மற்றும் தொலைநோக்குப் பார்வையின் கீழ், உயிரி தொழில்நுட்பத் துறையில் சிறப்பான மற்றும் புதுமைகளை ஊக்குவிப்பதில் ப்ரிக் முக்கியப் பங்கு வகிக்கிறது. ப்ரிக் அமைப்பின் முதல் நிறுவக நாள் விழாதேசிய நோயெதிர்ப்பு நிறுவனத்தில் இன்று  (2024 நவம்பர் 9) தொடங்கியது. இந்தியாவின் ஜி20 ஷெர்பா திரு அமிதாப் காந்த் இந்த நிகழ்வின் சிறப்பு விருந்தினராக கலந்து கொண்டு நிறுவக நாள் விரிவுரையையும் வழங்கினார். பெர்சிஸ்டன்ட் சிஸ்டம்ஸ் தலைவர் டாக்டர் ஆனந்த் தேஷ்பாண்டே சிறப்பு விருந்தினராக கலந்து கொண்டார். உயிரி தொழில்நுட்பத் துறை செயலாளரும், பிரிக் தலைமை இயக்குநருமான டாக்டர் ராஜேஷ் எஸ்.கோகலே, ப்ரிக் அமைப்பின் இயக்குநர்கள், உயிரி தொழில்நுட்பத் துறை மற்றும் ப்ரிக் அதிகாரிகள், ஆராய்ச்சியாளர்கள், பல்வேறு ப்ரிக் கல்வி நிறுவனங்களைச் சேர்ந்த மாணவர்கள் பங்கேற்றனர். 2024, நவம்பர் 10  அன்று ப்ரிக் நிறுவனங்கள் மற்றும் உயிரி தொழில்நுட்பத் துறை ஆகியவற்றில் பணிபுரிவோரின்  குடும்பங்களிடையே நல்லிணக்கத்தை வளர்ப்பதற்கும், உடல் தகுதி, குழுப்பணி மற்றும் பிணைப்பை மேம்படுத்துவதற்கும் கிரிக்கெட், பேட்மிண்டன், டேபிள் டென்னிஸ், செஸ் உள்ளிட்ட விளையாட்டுப் போட்டி, ஒன்றுகூடல் ஆகியவறிற்குத்   திட்டமிடப்பட்டுள்ளது. அனைத்து நிறுவனங்களிலும் உள்ள விஞ்ஞானிகளையும், ஆராய்ச்சியாளர்களையும் ஒன்றிணைப்பதில் பிரிக் முக்கிய பங்கு வகிக்கிறது. இந்திய உயிரி தொழில்நுட்பத் துறையை மேம்படுத்துவதில் பாராட்டத்தக்க விளைவுகளை இது எட்டும் என்று எதிர்பார்க்கப்படுகிறது. இந்த நிகழ்ச்சியில் பேசிய டாக்டர் கோகலே, “ஆராய்ச்சியின் ஒத்துழைப்பைக் கொண்டுவருதல், அறிவியல், தொழில்நுட்பம் மற்றும் கண்டுபிடிப்புகளின் சக்தியை மேம்படுத்துதல் மற்றும் மாற்றுதல் ஆகிய பின்னணியில் மதிப்பு மற்றும் தாக்கத்தை மேம்படுத்துவதில் ப்ரிக் முக்கிய பங்கு வகிக்கிறது” என்று குறிப்பிட்டார். சிறப்பு விருந்தினர் திரு. அமிதாப் காந்த் இத்துறையின் முயற்சிகளைப் பாராட்டியதோடு, “ப்ரிக் நாட்டிற்கு ஒரு மைல்கல் நிறுவனமாக இருக்கும்” என்றும்  குறிப்பிட்டார்.

உலக நோய்த்தடுப்பு தினம், ஆண்டுதோறும் நவம்பர் 10-ம் தேதி கடைப்பிடிக்கப்படுகிறது. தொற்று நோய்களைத் தடுப்பதிலும் பொது சுகாதாரத்தைப் பாதுகாப்பதிலும் தடுப்பூசிகள் வகிக்கும் முக்கிய பங்கு குறித்த விழிப்புணர்வை ஏற்படுத்துவதை இந்த தினம் நோக்கமாகக் கொண்டுள்ளது. நோய்த்தடுப்பு என்பது நோய்களைக் கட்டுப்படுத்துவதற்கும் ஒழிப்பதற்கும் மிகவும் பயனுள்ள, செலவு குறைந்த நடைமுறைகளில் ஒன்றாகும். இது ஒவ்வொரு ஆண்டும் உலகளவில் லட்சக் கணக்கான உயிர்களைக் காப்பாற்றுகிறது. தட்டம்மை, போலியோ, காசநோய், கொவிட் -19 போன்ற நோய்களிலிருந்து தனிநபர்களைப் பாதுகாக்க தடுப்பூசிகள் உதவுகின்றன. தொற்று நோய்களைக் குறைப்பதன் மூலம், நோய்த்தடுப்பு நடவடிக்கைகள் தனிநபர்களைப் பாதுகாப்பது மட்டுமல்லாமல், பொதுவான கூட்டு நோய் எதிர்ப்பு சக்தியை உருவாக்குவதன் மூலம் சமூக ஆரோக்கியத்தை வலுப்படுத்துகிறது. இந்த நாள் உலகெங்கிலும் தடுப்பூசிகளின் முக்கியத்துவத்தை வலியுறுத்துகிறது. இந்தியாவில் நோய்த் தடுப்பு; இந்தியாவில், தொலைதூர பகுதிகளை அடைவதில் நாடு எதிர்கொள்ளும் தனித்துவமான சவால்கள் காரணமாக உலக நோய்த்தடுப்பு தினம் குறிப்பாக முக்கியத்துவம் வாய்ந்தது.  முழுமையாக நோய்த்தடுப்பு அளிக்கப்பட்ட குழந்தைகளுடன் ஒப்பிடுகையில் பகுதியளவு நோய்த்தடுப்பு மற்றும் நோய்த்தடுப்பு அளிக்கப்படாத குழந்தைகள், குழந்தைப் பருவ நோய்களுக்கு மிகவும் எளிதில் பாதிக்கப்படுகின்றனர். அவர்கள் இறக்கும் ஆபத்தும் அதிகம். பல ஆண்டுகளாக இந்தியாவின் பொது சுகாதார உத்தியில் நோய்த்தடுப்பு ஒரு மையமாக உள்ளது. இது நோய் பாதிப்பு மற்றும் குழந்தை இறப்பு விகிதங்களைக் குறைப்பதில் குறிப்பிடத்தக்க முன்னேற்றத்திற்கு வழிவகுக்கிறது. எனவே, உலகளாவிய நோய்த்தடுப்புத் திட்டத்தை அடைவதில் இந்தியாவின் உறுதிப்பாட்டை வலுப்படுத்தவும், இந்திரதனுஷ் இயக்கம் உள்ளிட்ட முக்கிய முயற்சிகளின் மூலம் ஏற்பட்டுள்ள முன்னேற்றத்தைப் பிரதிபலிக்கவும் உலக நோய்த்தடுப்பு தினம் ஒரு வாய்ப்பாக அமைகிறது. ஒவ்வொரு நபருக்கும் உயிர் காக்கும் தடுப்பூசிகள் கிடைப்பதை உறுதி செய்வதற்கான தொடர்ச்சியான முயற்சிகளின் அவசியத்தையும் இந்த நாள் எடுத்துக்காட்டுகிறது. உலகளாவிய நோய்த்தடுப்பு திட்டம் (UIP): உலகளாவிய நோய்த்தடுப்பு திட்டம் (யுஐபி) இந்தியாவின் மிக விரிவான பொது சுகாதார முயற்சிகளில் ஒன்றாகும். இது ஒவ்வொரு ஆண்டும் பல லட்சக் கணக்கான புதிதாகப் பிறந்த குழந்தைகளுக்கும் கர்ப்பிணிப் பெண்களுக்கும் உயிர் காக்கும் தடுப்பூசிகளை வழங்குவதை நோக்கமாகக் கொண்டுள்ளது. ஆரம்பத்தில் 1978-ம் ஆண்டில் நோய்த்தடுப்பு விரிவாக்கப்பட்ட திட்டமாக தொடங்கப்பட்டது. இது 1985-ம் ஆண்டில் யுஐபி என மறுபெயரிடப்பட்டது. அது நகர்ப்புற மையங்களுக்கு அப்பால் கிராமப்புறங்களுக்கு நீட்டிக்கப்பட்டது. சுகாதார அணுகலில் உள்ள ஏற்றத்தாழ்வுகளை நிவர்த்தி செய்தது. 1992-ம் ஆண்டில், குழந்தை உயிர்வாழ்வு மற்றும் பாதுகாப்பான தாய்மை திட்டத்திலும் , பின்னர் 1997-ம் ஆண்டில், தேசிய குழந்தை நலத் திட்டத்திலும் இணைக்கப்பட்டது . 2005-ம் ஆண்டு முதல், தேசிய கிராமப்புற சுகாதார திட்டத்தின் கீழ் , நாட்டின் மிக தொலைதூர பகுதிகளில் கூட ஒவ்வொரு குழந்தைக்கும் தடுப்பூசிகள் சென்றடைவதை உறுதி செய்வதில் கவனம் செலுத்தி, இந்தியாவின் பொது சுகாதார முயற்சிகளின் மைய அங்கமாக யுஐபி மாறியது. ஆண்டுக்கு சுமார் 2.67 கோடி புதிதாகப் பிறந்த குழந்தைகளும் 2.9 கோடி கர்ப்பிணிப் பெண்களும் என்ற இலக்குடன் யுஐபி, நாட்டின் மிகவும் செலவு குறைந்த சுகாதார நடைமுறைகளில் ஒன்றாக மாறியுள்ளது. 5 வயதுக்குட்பட்ட இறப்பு விகிதம் 2014-ம் ஆண்டில் 1000 பிறப்புகளுக்கு 45 ஆக இருந்தது 1000. இப்போது அது 32 ஆக கணிசமாகக் குறைத்துள்ளது. 2023-24 நிதியாண்டிற்கான நாட்டின் முழு நோய்த்தடுப்பு பாதுகாப்பு தேசிய அளவில் 93.23% ஆக உள்ளது. தற்போது, இந்த திட்டம் டிப்தீரியா, டெட்டனஸ், போலியோ, தட்டம்மை மற்றும் ஹெபடைடிஸ் பி போன்ற நாடு முழுவதும் ஒன்பது நோய்கள் உட்பட 12 நோய்களுக்கு எதிராக இலவச நோய்த்தடுப்பு மருந்துகளை வழங்குகிறது. இந்த முயற்சியின் கீழ், ஒரு குழந்தை வாழ்க்கையின் முதல் வருடத்திற்குள் தேசிய அட்டவணையின்படி அனைத்து தடுப்பூசிகளையும் பெற்ற பிறகு முழுமையாக நோய்த்தடுப்பு செய்யப்பட்டதாகக் கருதப்படுகிறது. குறிப்பிடத்தக்க மைல்கற்களில் 2014-ல் போலியோ ஒழிப்பு மற்றும் 2015-ல் தாய் மற்றும் பிறந்த குழந்தை டெட்டனஸ் ஆகியவை அடங்கும். இந்த சாதனைகள் பொது சுகாதாரத்தைப் பாதுகாப்பதில் யுஐபி-யின் தாக்கத்தைக் காட்டுகின்றன. இந்திரதனுஷ் இயக்கம் 2014 டிசம்பரில் தொடங்கப்பட்ட இந்திரதனுஷ் இயக்கம், நாடு முழுவதும் உள்ள குழந்தைகளுக்கான முழு நோய்த்தடுப்பு பாதுகாப்பை அதிகரிப்பதை நோக்கமாகக் கொண்ட மத்திய அரசின் ஒரு முயற்சியாகும். இந்திரதனுஷ் இயக்கம் குறிப்பாக குறைந்த நோய்த்தடுப்பு விகிதங்களைக் கொண்ட பகுதிகளில் கவனம் செலுத்துகிறது. இதில் எளிதில் சென்றடைய முடியாத பகுதிகள் மற்றும் குழந்தைகளுக்குத் தடுப்பூசி போடப்படாத அல்லது ஓரளவு தடுப்பூசி போடப்பட்ட பகுதிகள் ஆகியவை அதிக கவனம் செலுத்தப்படுகின்றன. இந்த இயக்கம் ஒரு இலக்கு நோக்கிய அணுகுமுறையைக் கொண்டுள்ளது.  இந்திரதனுஷ் இயக்கம் தொடங்கப்பட்டதிலிருந்து, நாடு முழுவதும் 554 மாவட்டங்களை உள்ளடக்கிய 12 கட்டங்கள் நிறைவடைந்துள்ளன. யு-வின்: யு-வின் தளம் இந்தியாவின் நோய்த்தடுப்பு முயற்சிகளில் ஒரு பெரிய முன்னேற்றத்தைப் பிரதிபலிக்கிறது. உலகளாவிய நோய்த்தடுப்பு திட்டத்தின் கீழ் கர்ப்பிணிப் பெண்களுக்கும் குழந்தைகளுக்கும் தடுப்பூசி போடுவதற்கான முழுமையான டிஜிட்டல் பதிவை இது வழங்குகிறது. இந்தியாவின் பொது சுகாதார மைல்கற்கள்: இந்தியாவின் பொது சுகாதாரப் பயணம் உலகின் மிகப்பெரிய கொவிட் -19 தடுப்பூசி இயக்கம் உட்பட குறிப்பிடத்தக்க சாதனைகளைக் கொண்டுள்ளது.  போலியோ ஒழிப்பு முதல் டெட்டனஸை ஒழிப்பது வரை, சுகாதார விளைவுகளை மேம்படுத்துவதில் நாடு பெரும் முன்னேற்றம் கண்டுள்ளது. வலுவான உள்கட்டமைப்பு, செயலூக்கமான நோய் கட்டுப்பாட்டு முயற்சிகள், சர்வதேச ஒத்துழைப்பு ஆகியவை இந்தியாவுக்கு உதவியுள்ளன. இந்தியாவின் கொவிட் தடுப்பூசி இயக்கம்: 2021ம் ஆண்டு ஜனவரி 16 அன்று தொடங்கப்பட்ட இந்தியாவின் கொவிட்-19 தடுப்பூசி திட்டம், பொது சுகாதாரத்தில் உலகளாவிய வெற்றிக் கதையாக நிற்கிறது. 2023 ஜனவரி 6-க்குள், இந்த திட்டத்தில் 220 கோடிக்கும் அதிகமான தடுப்பூசிகள் செலுத்தப்பட்டன.  97% பேருக்கு குறைந்தது ஒரு டோஸ் மற்றும் 90% பேருக்குஇரண்டு டோஸ்களும் போடப்பட்டன. போலியோ இல்லாத இந்தியா: 2014 மார்ச் 27,  அன்று, உலக சுகாதார அமைப்பின் தென்கிழக்கு ஆசிய பிராந்தியத்தில் உள்ள மற்ற பத்து நாடுகளுடன் சேர்ந்து, இந்தியாவும் போலியோ இல்லாத நாடாக அதிகாரப்பூர்வமாக சான்றளிக்கப்பட்டது இது ஒரு குறிப்பிடத்தக்க பொது சுகாதார சாதனை. இந்தியாவின் கடைசி போலியோ 2011 ஜனவரி 13 அன்று மேற்கு வங்கத்தின் ஹவுராவில் பதிவானது. இருப்பினும், இந்த சான்றிதழ் இருந்தபோதிலும், போலியோ நோயால் பாதிக்கப்பட்டுள்ள ஆப்கானிஸ்தான், பாகிஸ்தானில் இருந்து போலியோ வைரஸ் வருவதற்கான அபாயம் இருப்பதால் நாடு விழிப்புடன் உள்ளது. போலியோவுக்கு எதிரான இந்தியாவின் வெற்றிகரமான போராட்டம் அதன் பரந்த நோய்த்தடுப்பு உள்கட்டமைப்பை வலுப்படுத்தியுள்ளது. இது நோய்த்தடுப்புக்கான இந்தியாவின் அர்ப்பணிப்பு பொது சுகாதாரத்தைப் பாதுகாப்பதற்கான ஒரு முழுமையான அணுகுமுறையைப் பிரதிபலிக்கிறது. ஒவ்வொரு தனிநபரையும், குறிப்பாக பின்தங்கிய, தொலைதூரப் பகுதிகளில் உள்ளவர்களை சென்றடைவதில் கவனம் செலுத்துகிறது. உலகளாவிய நோய்த்தடுப்புத் திட்டம், இந்திரதனுஷ் இயக்கம், யு-வின் தளம் போன்ற முன்முயற்சிகள் மூலம், நோய்த்தடுப்பு பாதுகாப்பை அதிகரிப்பது, தடுப்பூசி மூலம் தடுக்கக்கூடிய நோய்களை எதிர்த்துப் போராடுவது, குழந்தை இறப்பு விகிதத்தைக் குறைப்பது ஆகியவற்றில் நாடு குறிப்பிடத்தக்க முன்னேற்றங்களை அடைந்துள்ளது.  இந்த சாதனைகளை விரிவுபடுத்துவதற்கு தொடர்ச்சியான முயற்சிகள் அவசியம். ஆரோக்கியமான எதிர்காலத்திற்காக ஒவ்வொரு நபருக்கும் உயிர் காக்கும் தடுப்பூசிகள் கிடைப்பதை உறுதி செய்ய நாடு தீவிரமாக செயலாற்றி வருகிறது.

ஆந்திரா, கர்நாடகா, கேரளா, தமிழ்நாடு, தெலங்கானா, புதுச்சேரி யூனியன் பிரதேசத்தை உள்ளடக்கிய தென் மண்டலத்தில் உள்ள 10 மண்டல ஊரக வங்கிகளின் செயல்பாடுகள் குறித்து ஆய்வு செய்வதற்கான கூட்டம் மத்திய நிதி – கார்ப்பரேட் விவகாரங்கள் துறை அமைச்சர் திருமதி நிர்மலா சீதாராமன் தலைமையில் பெங்களூருவில் இன்று நடைபெற்றது. மத்திய நிதித்துறை இணையமைச்சர் திரு பங்கஜ் சவுத்ரியும் மூத்த அதிகாரிகளும், நபார்டு, சிட்பி ஆகியவற்றின் பிரதிநிதிகளும், மாநிலங்கள், யூனியன் பிரதேசங்களின் மூத்த அதிகாரிகளும் இந்தக் கூட்டத்தில் கலந்து கொண்டனர். 10 மண்டல ஊரக வங்கிகள் பங்கேற்ற இந்த கூட்டத்தில், வணிக செயல்திறன், டிஜிட்டல் தொழில்நுட்ப சேவைகளை மேம்படுத்துதல், விவசாயக் கடன், சிறு தொழில்துறை கடன்கள் தொடர்பான நடவடிக்கைகளில் வளர்ச்சியை ஊக்குவித்தல் ஆகியவை குறித்து கவனம் செலுத்தப்பட்டது. கிராமப்புற பொருளாதாரத்தை ஆதரிப்பதில் மண்டல ஊரக வங்கிகளின் முக்கிய பங்கைக் கருத்தில் கொண்டு, முத்ரா, பிரதமரின் விஸ்வகர்மா போன்ற மத்திய அரசின் பல்வேறு முதன்மைத் திட்டங்களின் கீழ் கடன் வழங்குவதை மண்டல ஊரக வங்கிகள், அவற்றின் ஆதரவு வங்கிகளின் உதவியுடன் அதிகரிக்க வேண்டும் என்று மத்திய நிதியமைச்சர் வலியுறுத்தினார். பால்வளம், கால்நடை பராமரிப்பு, மீன்வளம் போன்ற வேளாண் சார்ந்த நடவடிக்கைகளில் சிறப்பு கவனம் செலுத்தி, அடித்தள அளவிலான வேளாண் கடன் வழங்கலில் மண்டல ஊரக வங்கிகள் தங்கள் பங்கை அதிகரிக்க வேண்டும் என்றும் அவர் கேட்டுக் கொண்டார். மண்டல ஊரக வங்கிகளின் நிதி செயல்திறன், தொழில்நுட்ப மேம்பாடு ஆகியவற்றில் குறிப்பிடத்தக்க முன்னேற்றம் ஏற்பட்டுள்ளதாக மத்திய நிதியமைச்சர் கூறினார். தென் மண்டலத்தில் உள்ள இந்த வங்கிகள் 2024-ம் நிதியாண்டில் ரூ. 3,816 கோடி ஒருங்கிணைந்த லாபத்தை பதிவு செய்துள்ளன என்றும் இது அனைத்து மண்டல ஊரக வங்கிகளின் ஒருங்கிணைந்த லாபத்தில் 50% க்கும் அதிகமாகும் என்றும் அவர் குறிப்பிட்டார். ‘ஒரு மாநிலம் – ஒரே மண்டல ஊரக வங்கி (RRB)’ என்ற கொள்கையின் அடிப்படையில் மண்டல ஊரக வங்கிகளை இணைப்பதற்கான முன்மொழிவு குறித்து மாநில அரசுகள் தங்கள் கருத்துக்களை தெரிவிக்க வேண்டும் என்றும் மத்திய நிதியமைச்சர் வலியுறுத்தினார். இந்த ஆய்வின்போது, நடப்புக் கணக்கு, சேமிப்புக் கணக்கு வைப்புகளை (CASA) மேம்படுத்துவதன் முக்கியத்துவம் சுட்டிக் காட்டப்பட்டது. அனைவரையும் உள்ளடக்கிய நிதி சேவைகள் தொடர்பான பிரதமரின் தொலைநோக்குப் பார்வையை எடுத்துரைத்த மத்திய நிதித்துறை இணையமைச்சர் திரு பங்கஜ் சௌத்ரி, மத்திய அரசின் நிதி உள்ளடக்கத் திட்டங்களின் சாதனைகளுக்கு வங்கிகள் அதிகபட்சமாக பங்களிக்க வேண்டும் என்று வலியுறுத்தினார்.

காற்றுத் தர மேலாண்மை ஆணைக்குழுவின் தலைவர் தலைமையில் இன்று அந்த ஆணைக்குழுவின் கூட்டம் புதுதில்லியில் நடைபெற்றது. தரப்படுத்தப்பட்ட பதில் செயல் திட்டத்தின் (ஜிஆர்ஏபி) கீழ் செயல்படுத்தப்படும் நடவடிக்கைகளின் முன்னேற்றத்தையும் செயல்திறனையும் இக்கூட்டம் மதிப்பாய்வு செய்தது.  குறிப்பாக தில்லியில் காற்று மாசுபாடு அதிகம் ஏற்படும் பகுதிகளில் மேற்கொள்ளப்பட வேண்டிய நடவடிக்கைகள் குறித்து இதில் ஆலோசிக்கப்பட்டது. இந்த கூட்டத்தில் தில்லி தலைமைச் செயலாளர், சுற்றுச்சூழல், போக்குவரத்து போன்றவற்றின் மூத்த அதிகாரிகள் கலந்து கொண்டனர். கூட்டத்தின் போது, சம்பந்தப்பட்ட அனைத்து துறைகள், அதிகாரிகள், அமைப்புகள் ஆணையத்தால் வழங்கப்பட்ட வழிகாட்டுதல்களை கண்டிப்பாக செயல்படுத்த வேண்டும் என்று  வலியுறுத்தப்பட்டது. ஜி.ஆர்.ஏ.பி.யின் நிலை -1, நிலை-2 ஆகிய நிலைகளின் போது மேற்கொள்ளப்பட வேண்டிய / தீவிரப்படுத்தப்பட வேண்டிய முக்கிய தடுப்பு நடவடிக்கைகள் கூட்டத்தில் மீண்டும் வலியுறுத்தப்பட்டன. குளிர் காலத்தின் காற்று மாசுபாட்டை திறம்பட சமாளிக்க முக்கிய பகுதிகளிலும் பிற முன்னுரிமை பகுதிகளிலும் உள்ள அனைத்து தொடர்புடைய நிறுவனங்களுடனும் ஒருங்கிணைந்து மேற்கொள்ளப்பட வேண்டிய நடவடிக்கைகளின் அவசியத்தை இக்கூட்டம் வலியுறுத்தியது. மாசு கட்டுப்பாட்டு நடவடிக்கைகளை வெற்றிகரமாக செயல்படுத்துவதை உறுதி செய்வதற்கும், காற்றின் தரத்தில்  முன்னேற்றங்களை அடைவதற்கும் ஒரு கூட்டு அணுகுமுறை அவசியம் என்று வலியுறுத்தப்பட்டது.

க்யூஎஸ் (QS) உலக பல்கலைக்கழக தரவரிசை: ஆசியா 2025 என்பது ஆசிய கண்டம் முழுவதும் உள்ள உயர்கல்வியின் திறனைப் பிரதிபலிக்கிறது. கல்வி, ஆராய்ச்சி, புதுமை, சர்வதேசமயமாக்கல் ஆகியவற்றில் சிறந்து விளங்கும் சிறந்த நிறுவனங்களை இது பட்டியலிடுகிறது. இந்த ஆண்டு தரவரிசை ஆசிய பல்கலைக்கழகங்களிடையே வளர்ந்து வரும் போட்டியையும் உலகளாவிய கல்வித் தரங்களை மேம்படுத்துவதற்கான பிராந்தியத்தின் உறுதிப்பாட்டையும் வெளிப்படுத்துகிறது. க்யூஎஸ் உலக  தரவரிசை – ஆசியா 2025-ன் முதல் 50  முதல் இடங்களுக்குள் இந்தியாவின் 2 நிறுவனங்களும், முதல் 100 இடங்களில் முதல் இந்தியா ஏழு நிறுவனங்களும் இடம்பெற்றுள்ளன.  தில்லி இந்திய தொழில்நுட்ப நிறுவனம்  44வது இடத்தில் உள்ளது. பெட்ரோலியம் – எரிசக்தி ஆய்வுகள் பல்கலைக்கழகம் (யுபிஇஎஸ்) இந்திய நிறுவனங்களிடையே மிக முக்கியமான முன்னேற்றத்தை அடைந்துள்ளது. இது 70 இடங்கள் முன்னேறி 148 வது இடத்தைப் பிடித்துள்ளது. க்யூஎஸ் உலக பல்கலைக்கழக ஆசிய தரவரிசையின் முக்கிய அம்சங்கள்: இந்த தரவரிசை கிழக்கு, தெற்கு, தென்கிழக்கு மற்றும் மத்திய ஆசியாவில் உள்ள 25 நாடுகளை உள்ளடக்கிய 984 நிறுவனங்களை மதிப்பிடுகிறது. ‘க்யூஎஸ் உலக பல்கலைக்கழக தரவரிசை: ஆசியா 2025’  என்பது, நிறுவன செயல்திறன் குறித்து செயல்திறன் ஒப்பீடுகளைச் செய்கிறது. சமீபத்திய தரவரிசையில் அதிக எண்ணிக்கையிலான நிறுவனங்களுடன் இந்தியா தனித்து நிற்கிறது. முதல் 50-ல் இடம்பெற்ற நிறுவனங்கள்: இந்தியாவில் ஐஐடி தில்லி (44வது இடம்) மற்றும் ஐஐடி மும்பை (48வது இடம்) இது தவிர  ஐஐடி – சென்னை (56), ஐஐடி காரக்பூர் (60), இந்திய அறிவியல் நிறுவனம் (62), ஐஐடி கான்பூர் (67), தில்லி பல்கலைக்கழகம் (81) ஆகிய நிறுவனங்கள் இந்தியாவின் வலுவான கல்வி நிலையை வெளிப்படுத்துகின்றன.

கடற்படையின் திங்க் -2024 (THINQ 2024) என்ற வினாடி வினா போட்டியின் இறுதிப் போட்டியை இந்திய கடற்படை 2024 நவம்பர் 08 அன்று நடத்தியது. இந்தியாவின் கடல்சார் பாரம்பரியத்துக்கான அர்ப்பணிப்பின் அடையாளமான எழிமலாவில் உள்ள இந்திய கடற்படை அகாடமியின் அழகிய நாளந்தா பிளாக்கில் இறுதிச் சுற்று நடைபெற்றது.  பள்ளி மாணவர்கள், கடற்படை வீரர்கள், அவர்களின் குடும்பத்தினர், முன்னாள் வீரர்கள், சிறப்பு விருந்தினர்கள், பயிற்சியாளர்கள் போட்டியைக் கண்டுகளித்தனர்.  பங்கேற்ற அணிகள் பார்வையாளர்களை இருக்கைகளின் விளிம்பில் உட்கார வைத்திருந்தன. திங்க் 2024 கோப்பைக்கான கடுமையான போட்டியில் தொடர்ந்து ஜெய்ப்பூர் ஜெயஸ்ரீ பெரிவால் உயர்நிலைப் பள்ளி முதலிடத்தையும், சென்னை பி.வி.பவன் வித்யாஸ்ரமம் இரண்டாம் இடத்தையும் பிடித்தன. கடற்படைத் தளபதி அட்மிரல் தினேஷ் கே திரிபாதி மற்றும் உயர் அதிகாரிகள் இதில் பங்கேற்றனர். திங்க் 2024 இந்தியாவின் பிரகாசமான இளம் மனங்களின்  திறமையை வெளிப்படுத்தியது.  போட்டி மனப்பான்மையை வளர்ப்பதாகவும், கடற்படை வாழ்க்கை முறையை ஊக்குவிப்பதாகவும் இது அமைந்தது.

இந்திய உணவுக் கழகம் அதன் அலுவலகங்களிலும் கிடங்குகளிலும் தூய்மையை மேம்படுத்துவதற்கும், நிர்வாகத்தை மேம்படுத்துவதற்கும், பணியிட இட அனுபவத்தை மேம்படுத்துவதற்கும் 2024 செப்டம்பர் 16 அன்று தொடங்கப்பட்ட சிறப்பு இயக்கம் 4.0-வை வெற்றிகரமாக முடித்துள்ளது.  இந்த நாடு தழுவிய இயக்கத்தில், மண்டல, பிராந்திய, கோட்ட மட்டங்களில் உள்ள இந்திய உணவுக் கழக அலுவலகங்களிலிருந்தும், இந்திய உணவுக் கழக கிடங்குகளிலிருந்தும் விரிவான பங்கேற்பு காணப்பட்டது. சிறப்பு பிரச்சாரம் 4.0-ன் முக்கிய சிறப்பம்சங்கள்: *மொத்தம் 102,253 காகிதக் கோப்புகள் மதிப்பாய்வு செய்யப்பட்டன. *38,207 மின்-கோப்புகள் மதிப்பாய்வு செய்யப்பட்டு 5,000 மின்-கோப்புகள் மீதான பணிகள் முடிக்கப்பட்டன. பல்வேறு இந்திய உணவுக் கழக இடங்களில் மொத்தம் 858 தூய்மை இயக்கங்கள் நடத்தப்பட்டன. கழிவிகளை அகற்றுவதன் மூலமும், 19,743 சதுர அடி அலுவலக இடத்தை விடுவித்து ரூ.1,71,722 வருவாய் ஈட்டப்பட்டது. சிறப்பு இயக்கம் 4.0 முடிவடையும் போது, இந்திய உணவுக் கழகமான எஃப்.சி.ஐ, சுத்தமான, பசுமையான, நன்கு ஒழுங்கமைக்கப்பட்ட பணியிடச் சூழலை மீண்டும் உறுதிப்படுத்தியது.

உள்நாட்டுத் தயாரிப்புகளுக்கான இந்தியாவின் தொலைத்தொடர்பு தொழில்நுட்பச் சூழலில் குறிப்பிடத்தக்க முன்னேற்றமாக இந்திய அரசின் தொலைத்தொடர்புத் துறையின் கீழ் உள்ள ஒரு முன்னணி ஆராய்ச்சி மற்றும் மேம்பாட்டு நிறுவனமான சி-டாட், லீனியரைஸ்டு ஆம்ப்ளிபையர் டெக்னாலஜி சர்வீசஸ் நிறுவனத்துடன் ஒரு ஒப்பந்தத்தில் கையெழுத்திட்டுள்ளது. மத்திய அரசின் தொலைத் தொடர்புத் துறையின் தொலைத்தொடர்பு தொழில்நுட்ப மேம்பாட்டு நிதி (டி.எஃப்) திட்டத்தின் கீழ் இந்த ஒப்பந்தம் கையெழுத்தானது. இந்த திட்டம் தொலைத்தொடர்பு தொழில்நுட்பங்களின் வடிவமைப்பு, மேம்பாடு, வணிகமயமாக்கல் ஆகியவற்றுகு நிதி ஆதரவை வழங்குகிறது. இந்தியாவின் டிஜிட்டல் இடைவெளியைக் குறைப்பதில் முக்கிய பங்கு வகிக்கும் மலிவு பிராட்பேண்ட், மொபைல் சேவைகளை செயல்படுத்துவதற்கான இந்திய அரசின் பணியின் ஒரு மைல்கல்லாக இது உள்ளது. இந்த ஒப்பந்தம் கையெழுத்திடும் விழாவில் சி-டாட் இயக்குநர் டாக்டர் பங்கஜ் குமார் தலேலா, லினியரைஸ்டு ஆம்ப்ளிஃபையர் டெக்னாலஜி அண்ட் சர்வீசஸ் பிரைவேட் லிமிடெட் இயக்குநர்கள் திரு விவேக் சர்மா மற்றும் பேராசிரியர் கருண் ராவத் ஆகியோர் கலந்து கொண்டனர்.

வட்டல் தாம் ஆலயத்தின் 200-வது ஆண்டு நிறைவை நினைவுகூரும் வகையிலும் ஸ்ரீ சுவாமிநாராயண் சம்பிரதாயத்தில் அதன் முக்கிய பங்கை கௌரவிக்கும் வகையிலும் ஒரு சிறப்பு அஞ்சல் தலை வெளியிடப்பட்டது. உலகம் முழுவதும் பரவியுள்ள ஸ்ரீ ஸ்வாமிநாராயண் சம்பிரதாயத்தின் ஆன்மீக தலைமை இடமாக இந்தக் கோயில் விளங்குகிறது. சத்குரு ஸ்ரீ பிரம்மானந்த் சுவாமி, சத்குரு ஸ்ரீ அக்ஷாரானந்த சுவாமி ஆகியோரால் இந்த கோயில் கட்டப்பட்டது. இந்த கோயில் தாமரை வடிவில் கட்டப்பட்டுள்ளது. இது அனைத்து மதத்தினரிடையேயான நல்லிணக்க உணர்வின் அடையாளமாக உள்ளது. கடவுள்கள், தேவியர்கள் ஆகியோரின் கடந்த கால அவதாரங்களின் சித்தரிப்புகளும் இதில் அடங்கும். இந்த ஆலயம் தொடர்பான அஞ்சல் தலை இன்று (09.11.2024) குஜராத்தின் கேடா மாவட்டத்தில் உள்ள வட்டலில் வெளியிடப்பட்டது. நிகழ்ச்சியில் குஜராத் முதலமைச்சர் திரு பூபேந்திரபாய் படேல், ஆச்சார்யா மஹராஜ் 1008 ஸ்ரீ ராகேஷ் பிரசாத் ஜி, டாக்டர் ஸ்ரீ சாந்த்வல்லபசுவாமி, வத்தலாதம் மந்திரின் தலைமை நிர்வாகி கோத்தாரி, வதோதரா போஸ்ட் மாஸ்டர் ஜெனரல் தினேஷ்குமார் சர்மா உள்ளிட்டோர் பங்கேற்றனர். ஸ்ரீ ஸ்ரீ ஜெய்ராஜ் டி.ஜி வடிவமைத்த சிறப்பு அஞ்சல்தலை, வட்டல்தாம் கோயிலின் அற்புதமான பாரம்பரிய கட்டிடக்கலையை வெளிப்படுத்துகிறது. இந்த கோயில் ஒன்பது தங்க குவிமாடங்களைக் கொண்ட தாமரை வடிவத்தில் உள்ளது. இந்த அஞ்சல்தலை வட்டலின் வளமான பாரம்பரியத்தையும், எண்ணற்ற பக்தர்களின் வாழ்க்கையில் அதன் குறிப்பிடத்தக்க தாக்கத்தையும் குறிக்கிறது. வடல்தாம் த்விஷதாப்தி மஹோத்சவத்தில் இந்த தபால் தலையை வெளியிடுவதில் அஞ்சல் துறை பெருமிதம் கொள்கிறது.