पंतप्रधानांनी 14 व्या भारत-फ्रान्स सीईओ मंचाला केले संबोधित

पंतप्रधान नरेंद्र मोदी आणि फ्रान्सचे अध्यक्ष इमॅन्युएल मॅक्रॉन यांनी आज पॅरिसमध्ये 14 व्या भारत-फ्रान्स सीईओ मंचाला संयुक्तपणे संबोधित केले. संरक्षण, एरोस्पेस, महत्वपूर्ण आणि उदयोन्मुख तंत्रज्ञान, पायाभूत सुविधा, प्रगत उत्पादन, कृत्रिम बुद्धिमत्ता, जीवन-विज्ञान, निरामय आरोग्य  आणि जीवनशैली, तसेच अन्न आणि आदरातिथ्य यासारख्या क्षेत्रांवर लक्ष केंद्रित करून दोन्ही देशांमधील कंपन्यांच्या विविध गटातील मुख्य कार्यकारी अधिकारी (सीईओ) या मंचावर एकत्र आले होते. .

आपल्या संबोधनात पंतप्रधानांनी भारत-फ्रान्स दरम्यान व्यापार आणि आर्थिक सहकार्याचा विस्तार आणि दोन्ही देशांमधील धोरणात्मक भागीदारीला त्यातून मिळालेली चालना यांचा उल्लेख केला. स्थिर सरकार  आणि अपेक्षित धोरणात्मक परिसंस्थेच्या आधारावर भारत जागतिक गुंतवणुकीचे पसंतीचे  ठिकाण बनल्याचे त्यांनी अधोरेखित केले. नुकत्याच सादर झालेल्या अर्थसंकल्पात घोषित केलेल्या सुधारणांबद्दल बोलताना, पंतप्रधानांनी नमूद केले की विमा क्षेत्र आता 100% थेट परदेशी गुंतवणुकीसाठी आणि  एसएमआर आणि एएमआर  तंत्रज्ञानावर लक्ष केंद्रित करून नागरी अणुऊर्जा क्षेत्र खाजगी सहभागासाठी खुले करण्यात आले आहे; सीमाशुल्क दर रचनेचे सुसूत्रीकरण  करण्यात आले आहे ,जीवन सुलभता वृद्धिंगत करण्यासाठी सुलभ प्राप्तिकर संहिता आणली आहे.  सुधारणा सुरू ठेवण्याप्रति सरकारच्या वचनबद्धतेसंदर्भात  त्यांनी नमूद केले की विश्वासावर आधारित आर्थिक शासन व्यवस्था स्थापित करण्यासाठी नियामक सुधारणांसाठी एका उच्चस्तरीय समितीची  स्थापना करण्यात आली आहे. त्याच बरोबर , गेल्या काही वर्षांमध्ये 40,000 हून अधिक अनुपालन तर्कसंगत करण्यात आले आहेत.

संरक्षण , ऊर्जा, महामार्ग, नागरी विमान वाहतूक, अंतराळ, आरोग्यसेवा, फिनटेक आणि शाश्वत विकास क्षेत्रांमध्ये भारताने उल्लेखनीय यश मिळवले असून त्यातून निर्माण झालेल्या अफाट संधी पाहण्यासाठी पंतप्रधानांनी फ्रेंच कंपन्यांना आमंत्रित केले. भारताची कौशल्ये, प्रतिभा आणि नवोन्मेष तसेच अलिकडेच सुरु करण्यात आलेले एआय , सेमीकंडक्टर, क्वांटम, महत्वपूर्ण खनिजे आणि हायड्रोजन मिशनची  जगभरात झालेली प्रशंसा  आणि त्याबाबत स्वारस्य अधोरेखित करून, त्यांनी फ्रेंच उद्योगांना परस्पर विकास आणि समृद्धीसाठी भारताबरोबर भागीदारी करण्याचे आवाहन केले. नवोन्मेष, गुंतवणूक आणि तंत्रज्ञान-प्रणित भागीदारीला चालना देण्यासाठी दोन्ही देश वचनबद्ध असल्याचा पुनरुच्चार करत या क्षेत्रांमध्ये सक्रिय सहभाग महत्वाचा असल्याचे त्यांनी स्पष्ट केले. पंतप्रधानांचे संपूर्ण संबोधन येथे पाहता येईल

परराष्ट्र व्यवहार मंत्री डॉ. एस. जयशंकर यांच्यासह फ्रान्सचे युरोप आणि परराष्ट्र व्यवहार मंत्री  जीन-नोएल बॅरोट, आणि फ्रान्सचे अर्थव्यवस्था, वित्त आणि औद्योगिक आणि डिजिटल सार्वभौमत्व मंत्री एरिक लोम्बार्ड यांनीही सीईओ मंचाला संबोधित केले.

दोन्ही बाजूंचे मुख्य कार्यकारी अधिकारी या बैठकीला उपस्थित होते. हा तपशील पुढील प्रमाणे.

भारतीय पक्ष

फ्रेंच पक्ष