മത്സ്യബന്ധന യാനങ്ങളുടെ രജിസ്ട്രേഷൻ, സർവേ, സർട്ടിഫിക്കേഷൻ എന്നിവയുമായി ബന്ധപ്പെട്ട ഏകദിന ശിൽപശാല കേന്ദ്ര സഹമന്ത്രി ശ്രീ. ജോർജ്ജ് കുര്യൻ CIFNET-ൽ ഉദ്ഘാടനം ചെയ്തു

കേന്ദ്ര ഫിഷറീസ്, മൃഗസംരക്ഷണം, ക്ഷീരവകുപ്പ്, ന്യൂനപക്ഷകാര്യ സഹമന്ത്രി ശ്രീ. ജോർജ് കുര്യൻ ഇന്ന് കൊച്ചിയിൽ മത്സ്യബന്ധന യാനങ്ങളുടെ രജിസ്ട്രേഷൻ, സർവേ, സർട്ടിഫിക്കേഷൻ എന്നിവയുമായി ബന്ധപ്പെട്ട ഏകദിന ശിൽപശാല ഉദ്ഘാടനം ചെയ്തു. കേന്ദ്ര ഫിഷറീസ്, മൃഗസംരക്ഷണം, ക്ഷീരോൽപാദന മന്ത്രാലയത്തിന് കീഴിലുള്ള ഫിഷറീസ് വകുപ്പാണ്  സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് നോട്ടിക്കൽ ആൻഡ് എഞ്ചിനീയറിംഗ് ട്രെയിനിംഗിൽ (സിഫ്നെറ്റ്)  പരിപാടി സംഘടിപ്പിച്ചത്.

രാജ്യത്തുടനീളമുള്ള മത്സ്യബന്ധന  യാനങ്ങൾ  നേരിടുന്ന പ്രശ്നങ്ങളും പ്രതിസന്ധികളും ചൂണ്ടിക്കാട്ടുകയും 2047 ൽ വികസിത ഭാരതം എന്ന ലക്‌ഷ്യത്തിൽ ഉൾപ്പെടുത്തി മത്സ്യത്തൊഴിലാളി സമൂഹത്തിൻ്റെ മെച്ചപ്പെട്ട ഉപജീവനത്തിനായി ഒരു ചട്ടക്കൂടും നയവും കൊണ്ടുവരാൻ  ഉദ്ഘാടന പ്രസംഗത്തിൽ കേന്ദ്രമന്ത്രി ശ്രീ. ജോർജ്ജ് കുര്യൻ, നിർദ്ദേശിക്കുകയും  ചെയ്തു. ഇതിനായി രാജ്യത്തിൻ്റെ സമുദ്ര മത്സ്യസമ്പത്ത് പൂർണ്ണമായി ഉപയോഗപ്പെടുത്തുന്നതിനായി മത്സ്യബന്ധന യാനങ്ങളുടെ എണ്ണം മെച്ചപ്പെടുത്തേണ്ടതുണ്ടെന്ന്  അദ്ദേഹം പറഞ്ഞു .

കൂടാതെ, 2014-ൽ കേന്ദ്ര ഗവൺമെൻറ് വിഭാവനം ചെയ്ത  പ്രകാരം രാജ്യത്തെ മത്സ്യബന്ധന യാനങ്ങളുടെ രജിസ്ട്രേഷനിൽ ഏകീകൃതയുടെ ആവശ്യകത കേന്ദ്രമന്ത്രി എടുത്തു പറഞ്ഞു . മത്സ്യബന്ധന യാനങ്ങൾക്കുള്ള ലൈസൻസ് അതത് തീരദേശ സംസ്ഥാനങ്ങളാണ് നൽകുന്നതെന്ന് അദ്ദേഹം ആവർത്തിച്ചു, അതിനാൽ തങ്ങളുടെ  അധികാരപരിധിയിൽ ലൈസൻസില്ലാതെ ഒരു മത്സ്യബന്ധന യാനവും  പ്രവർത്തിക്കുന്നില്ല എന്ന് നിരീക്ഷിക്കേണ്ടത് അതാത് സംസ്ഥാനങ്ങളുടെ കടമയാണ്.

തുറമുഖ, ഷിപ്പിംഗ്, ജലപാത മന്ത്രാലയത്തിൻ്റെ ഡയറക്ടർ ജനറലിന്റെ  സാങ്കേതിക പിന്തുണയോടെയാണ് പരിപാടി സംഘടിപ്പിച്ചത്. കേന്ദ്ര ഫിഷറീസ് വകുപ്പ് ജോയിൻ്റ് സെക്രട്ടറി (മറൈൻ ഫിഷറീസ്)  ശ്രീമതി നീതു കുമാരി പ്രസാദ് ഐഎഎസ് അധ്യക്ഷത വഹിച്ചു.

സിഫ്‌നെറ്റ് ഡയറക്ടർ ശ്രീ. എം.ഹബീബുള്ള വിശിഷ്ടാതിഥികളെയും പങ്കെടുത്തവരെയും  സ്വാഗതം ചെയ്തു.  ശ്രീ അജിത്കുമാർ സുകുമാരൻ- ചീഫ് സർവേയർ-കം-അഡിഷണൽ ., ഡിജി (എഞ്ചിനീയറിംഗ്), ഡിജി ഷിപ്പിംഗ്;  ഡോ ബിജയ് കുമാർ  ബെഹ്റ-ചീഫ് എക്സിക്യൂട്ടീവ്, NFDB; ഡോ. ജോർജ് നൈനാൻ -ICAR-CIFT ഡയറക്ടർ ; ഡോ. ശ്രീനാഥ് കെ.ആർ-ഫിഷറീസ് സർവേ ഓഫ് ഇന്ത്യ ഡയറക്ടർ ജനറൽ ;ഡോ. സഞ്ജയ് പാണ്ഡെ – ഫിഷറീസ് വകുപ്പ് ഡെപ്യൂട്ടി  കമ്മീഷണർ എന്നിവർ ഉദ്ഘാടന ചടങ്ങിൽ സന്നിഹിതരായിരുന്നു.

ഫിഷറീസ് മേഖലയുടെ നിയന്ത്രണ ചട്ടക്കൂടിനായി വ്യക്തമായ നിർദ്ദേശങ്ങൾ പങ്കുവെയ്ക്കാൻ കേന്ദ്ര ഫിഷറീസ് വകുപ്പ് ജോയിൻ്റ് സെക്രട്ടറി (മറൈൻ ഫിഷറീസ്) ശ്രീമതി നീതു കുമാരി പ്രസാദ് ഐഎഎസ് പങ്കാളികളോട് അഭ്യർത്ഥിച്ചു

തദവസരത്തിൽ, സെൻട്രൽ ഇൻസ്റ്റിറ്റ്യൂട്ട് ഓഫ് ഫിഷറീസ് നോട്ടിക്കൽ ആൻഡ് എഞ്ചിനീയറിംഗ് ട്രെയിനിംഗിൻ്റെ നവീകരിച്ച വെബ്‌സൈറ്റ് (https://cifnet.gov.in) കേന്ദ്രമന്ത്രി  ഉദ്ഘാടനം ചെയ്തു.  ശ്രീമതി പാർവതി ദേവി (സീനിയർ ഡയറക്ടർ (ഐടി), എൻഐസി-സിഇഎം, കൊച്ചി) സന്നിഹിതയായിരുന്നു

ഷിപ്പിംഗ് ഡയറക്ട്രേറ്റ്  ജനറൽ നിന്നുള്ള അംഗങ്ങൾ, എംഎംഡി, ഐസിഎആർ-സിഐഎഫ്ടി, ഐസിഎആർ-സിഎംഎഫ്ആർഐ എന്നിവിടങ്ങളിൽ നിന്നുള്ള ശാസ്ത്രജ്ഞർ, ഫിഷറീസ് വകുപ്പിലെ ഉദ്യോഗസ്ഥർ, കേന്ദ്ര ഗവൺമെൻറ് , ഗുജറാത്ത്, മഹാരാഷ്ട്ര, ഗോവ, കർണാടക, കേരളം, തമിഴ്നാട്, ആന്ധ്രാപ്രദേശ്, ഒഡീഷ തീരദേശ സംസ്ഥാനങ്ങളിലെ ഫിഷറീസ് വകുപ്പ് ഉദ്യോഗസ്ഥർ,കൂടാതെ കേന്ദ്രഭരണ പ്രദേശമായ പുതുച്ചേരി, ദാമൻ & ദിയു, ലക്ഷദ്വീപ് എന്നിവിടങ്ങളിൽ നിന്നുള്ളവരും പരിപാടിയിൽ പങ്കെടുത്തു. ഉദ്ഘാടന സെഷനുശേഷം മത്സ്യബന്ധന യാനങ്ങളുടെ രജിസ്ട്രേഷൻ, സർവേ, സർട്ടിഫിക്കേഷൻ എന്നിവയെക്കുറിച്ചുള്ള ശിൽപശാലയുടെ സാങ്കേതിക സെഷനും നടന്നു .